د اجباري راستنېدونکو کډوالو لپاره په لغمان کې د شته ښارګوټي د وضعیت ارزونه وشوه
۱۴۴۶/۰۷/۰۵
لغمان ولایت کې د کور او ښار جوړولو ریاست محترم رئیس مولوي حسین احمد تېلوي وایي، د اجباري راستېدونکو کډوالو لپاره د ځمکې د وېش ولایتي کمېټې د یادې موضوع په تړاو خپله څلورمه ناسته وکړه.
ښاغلی مولوي تېلوي وایي، دغه ناسته په لغمان کې د کور او ښار جوړولو ریاست په مشرۍ ترسره شوه، چې په کې د راستنېدونکو کډوالو د چارو محترم رئیس مولوي غلام الرحمن بلال، د اوبو او انرژۍ محترم ریاست استازي، د کرنې، اوبو لګولو او مالدارۍ ریاست د کدسترمحترم مدیر انجنیر احمدالله، د مهترلام ښار محترم ښاروال مولوي رحمت الله شهامت او د چاپېریال ساتنې محترم رئیس حاجي احمدشاه ابراهیمي ګډون درلود.
نوموړی وایي په ناسته کې، د بابا صاحب مهاجرینو د ښارګوټي په تفصیلي پلان کې د هغو نمرو د په نښه کولو باندې خبرې وشوې چې د مهاجرینو چارو د ریاست لخوا یې پخوا توزیع شوې ده.
هغه وایي، د راستنېدونکو کډوالو د چارو رئیس د ناستې ګډون والو ته د توزیع شوو او له توزیع د پاتې نمرو په اړه معلومات ورکړل.
دغه معلومات به د وروستیو کړنو په پار د کور او ښار جوړولو وزارت محترم مقام سره شریک شي.
د کور او ښار جوړولو وزارت د خپلو ولایتي کمېټې په همکارۍ هڅې ګړندۍ کړي چې د اجباري راستنېدونکو کډوالو لپاره په کور دننه د مناسبې سرپناه جوړولو لپاره استوګنیز ښارګوټي، سروې، پلان جوړ، نمره او د لیست له مخې ووېشي.
