ښار جوړولو او ځمکو وزارت سرپرست او نوماند وزیر د افغانستان د ډیزاین له مرکز څخه لیدنه وکړه
ښارجوړولو او ځمکو وزارت سرپرست او نوماند وزیر محترم محمود کرزي د دې وزارت له بېلابېلو برخو څخه د خپلو لیدونو په دوام، د افغانستان د ډیزاین مرکز او د ساختماني چارو معینیت له یو شمېر برخو لیدنه وکړه.
په دې لیدنه کې لومړی د ښارجوړولو او ځمکو وزارت د ساختماني چارو معین محترم سید نسیم خلیق د افغانستان د ډیزاین مرکز او د یاد معینیت ټولې برخې ور وپېژندلې.
ور پسې د ښارجوړولو او ځمکو وزارت سرپرست او نوماند وزیر محترم محمود کرزي وویل، په ده سبز کې د نوي کابل ښار جوړول، د نویو ښارونو جوړونه، د هرات او جلال اباد ښارونو معیاري پراختیا او د هېواد په کچه د املاکو الکټرونیکي کېدل زما درې اساسي لومړیتوبونه دي.
ښارجوړولو او ځمکو سرپرست وزیر د خپلو خبرو په دوام زیاته کړه، مسکن د خلکو یوه جدي اړتیا ده او یاد وزارت باید د خلکو دا اړتیا پوره کړي.
محترم محمود کرزي همداراز اړونده برخو ته هدایت ورکړ چې هرڅه ژر د اړتیا وړ تجهیزات چمتو او شته کمبودیانې لمنځه یوسي.
د ښارجوړولو او ځمکو وزارت سرپرست او نوماند وزیر په پای کې له ټولو کارکوونکو وغوښتل چې خپل کارونه په منظم ډول پرمخ یوسي او په دې برخه کې یې هغوئ ته د د ګډ کار او د چارو په ترسره کولو کې د ژمنتیا ډاډ ورکړ.
