د هېواد په درېیو ولایتونو کې د ۱۲ زره جریبه ځمکې په مساحت د صنعتي پارکونو تفصیلي پلانونه ترتیب او لاسلیک شول
۱۴۴۸/۶/۵
د کور او ښار جوړولو وزارت محترم وزیر الحاج مولوي نجیبالله حیات حقاني د کندز، هرات او میدان وردګ ولایتونو د درېیو صنعتي پارکونو هغه تفصیلي پلانونه لاسلیک کړل، چې د وزارت د مسلکي انجنیرانو له لوري د تخنیکي او مسلکي معیارونو په پام کې نیولو سره ترتیب شوي وو.
په دغو پلانونو کې د کندز ولایت د عبدالرحمن بن سمره صنعتي پارک د ۱۰ زره جریبه ځمکې په مساحت او ۲۴۳ صنعتي نمرو، د هرات ولایت د مولانا جامي صنعتي پارک د ۱۰۰۰ جریبه ځمکې په مساحت او ۴۸۶ صنعتي نمرو، او د میدان وردګ ولایت د کوتل تخت په سیمه کې د محمد بن قاسم صنعتي پارک د ۱۰۰۰ جریبه ځمکې په مساحت او ۲۷۷ صنعتي نمرو طرحه شوی دی.
د یادو درېیو صنعتي پارکونو ټولیزه ساحه ۱۲ زره جریبه ځمکه او د صنعتي نمرو شمېر یې ۱۰۰۶ ته رسېږي. د دغو پلانونو د ترتیب موخه د صنعتي فعالیتونو لپاره د منظمې او معیاري ساحې رامنځته کول، د ځمکې اغېزمن مدیریت او د هېواد د صنعتي پراختیا لپاره د مناسبو شرایطو برابرول دي.
یاد تفصیلي پلانونه د اړوندو ادارو ته د تطبیق په موخه سپارل شوي، څو د پلي کېدو له لارې یې د صنعتي فعالیتونو د پراختیا او پانګونې لپاره زمینه برابره شي.
