د عصري ټکنالوژۍ په پلي کېدو سره د خلکو د خدمتونو وړاندې کولو بهیر لا چټکېږي
۲۱/۲/۱۴۴۸
د کور او ښار جوړولو وزارت د معلوماتي ټکنالوژۍ ریاست له لوري، د مخابراتو او معلوماتي ټکنالوژۍ وزارت د سیسټمسازۍ د ښوونیزې څانګې په همکارۍ، د اداري مکتوبونو او اسنادو د مدیریت سیسټم په اړه ښوونیز او معلوماتي پروګرام ترسره شو.
په دغه پروګرام کې د کور او ښار جوړولو وزارت د مالي او اداري چارو محترم معین مولوي محمد رباني ناصح، د ښاري چارو محترم معین شیخ مدارعلي کریمي بامیاني، د مسکن ودانیزو چارو او د برنامو د پراختیا محترم معین الحاج مولوي ګل زرین صابر، د وزارت رئیسانو، انجنیرانو او اجرائیوي مدیرانو ګډون کړی و.
د غونډې په ترڅ کې د ښاري چارو محترم معین شیخ مدارعلي کریمي بامیاني وویل، د خلکو د خدمتونو د چټکې، اغېزمنې او معیاري وړاندې کولو لپاره د عصري ټکنالوژۍ کارول د دولتي ادارو له مهمو اړتیاوو او اساسي مسئولیتونو څخه دي.
نوموړي زیاته کړه، نننۍ نړۍ د معلوماتي ټکنالوژۍ پر بنسټ پرمختګ کوي او ډېری هېوادونه په دې برخه کې د پام وړ لاسته راوړنې لري؛ له همدې امله اړینه ده چې موږ هم د خپلو اداري چارو د لا ښه والي او د خدمتونو د کیفیت د لوړولو لپاره له عصري ټکنالوژۍ څخه اغېزمنه ګټه واخلو.
ښاغلي بامیاني همداراز څرګنده کړه، چې دودیز او کاغذي اداري سیسټمونه د اوسنیو اړتیاوو د پوره کولو وړتیا نه لري، نو د وخت غوښتنه دا ده چې د ادارو په ورځنیو چارو کې له برېښنايي او عصري سیسټمونو څخه استفاده وشي، ترڅو چارې په چټکۍ، روڼتیا او لوړ کیفیت سره ترسره شي.
ورپسې د مخابراتو او معلوماتي ټکنالوژۍ وزارت د اداري مکتوبونو او اسنادو د مدیریت سیسټم د ښوونیزې برخې مسئول محترم عبیدالله داودزي او د هغه همکارانو د برېښنايي وارده او صادره مکتوبونو د سیسټم، د مکتوبونو او استعلامونو د برېښنايي لېږد څرنګوالي او د دغه سیسټم د موخو او ګټو په اړه هر اړخیز معلومات وړاندې کړل.
دوی ډاډ څرګند کړ، چې په نږدې راتلونکي کې به د دولتي ادارو ترمنځ د مکتوبونو او استعلامونو د لېږد بهیر په بشپړه توګه برېښنايي او عصري شي، چې په پایله کې به اداري چارې لا چټکې، منظمې او اغېزمنې شي.
د پروګرام په پای کې د ګډونوالو پوښتنو ته د ښوونیزې ډلې له لوري لازم ځوابونه وړاندې شول او پرېکړه وشوه، چې د مکتوبونو او استعلامونو د برېښنايي لېږد اړوند د اړتیا وړ نورو موضوعاتو په اړه به د کور او ښار جوړولو وزارت د معلوماتي ټکنالوژۍ ریاست له خوا د وزارت اړوندو ریاستونو ته جلا روزنیز پروګرامونه هم جوړ او وړاندې شي.
