د بغلان دوشي ولسوالۍ دهن مورچل غوري سیمې لپاره هم تفصیلي پلان جوړ او منظور شو
۱۴۴۷/۹/۱۵
د کور او ښار جوړولو وزارت محترم وزیر الحاج مولوي نجیب الله حیات حقاني، د بغلان ولایت د دوشي ولسوالۍ اړوند دهن مورچل غوري سیمې لپاره جوړ شوی تفصیلي ښاري پلان منظور او لاسلیک کړ.
دغه پلان د یاد وزارت د تفصیلي پلانونو د محترم ریاست له لوري جوړ او عملاً تائید شو، چې اړوندې ادارې ته به د تطبیق په موخه وسپارل شي.
د دوشي ولسوالۍ اړوند د دهن موروچل غوري ساحې لپاره تفصیلي ښاري پلان به په ۵۴۳.۵۴ جریبه ځمکه کې عملي شي.
دغه پراخ تفصیلي پلان د منظمې استوګنې، سوداګریزو فعالیتونو او عامه خدمتونو د ښه تنظیم په موخه طرحه شوی دی.
په پلان کې د استوګنیزو نمراتو منظم وېش، سوداګریز مارکېټونه، شنې ساحې، پارکونه، ښوونیز او روغتیایي مرکزونه، جوماتونه، اداري تاسیسات او پراخ سړکونه شامل دي.
د تخنیکي برخې له مخې، د سړکونو شبکه به د عصري معیارونو پر بنسټ جوړه شي چې د ترافیکي اسانتیا تر څنګ به د باران اوبو د ایستلو منظم سیستم هم ولري.
د دې ستر پلان عملي کېدل به د سیمې غیرمنظمې ودانیزې چارې منظمې کړي، د ځمکو ارزښت به لوړ کړي او سلګونو کسانو ته به د کار کولو زمینه برابره کړي.
تمه ده چې د دهن موروچل غوري ساحې دا پراخ تفصیلي پلان به د دوشي ولسوالۍ د ښاري پراختیا لپاره یو مهم بنسټ وګرځي او په ټوله کې به د بغلان ولایت د متوازن پرمختګ په بهیر کې رغنده رول ولوبوي.
