د بلخ ولسوالۍ ښاري وضعیت او پراختیایي اړتیاوې و ارزول شوې
۱۴۴۷/۰۸/۰۸
د بلخ ولایت د بلخ ولسوالۍ د ښار ښاري وضعیت، پراختیايي بهیر او بنسټیزې ننګونې د تخنیکي ارزونې او تحلیلي څېړنې له لارې و ارزول شوې، د ترسره شوې ارزونې موخه دا وه چې د موجودو ښاري پلانونو اغېزمنتیا وڅېړل شي او د ښار د اوسنیو او راتلونکو اړتیاوو لپاره د مناسبې حللارې اړتیا تشخیص شي.
د ارزونې له مخې، بلخ ښار د تاریخي، فرهنګي او اقتصادي ارزښت ترڅنګ، په وروستیو لسیزو کې د نفوس د چټک زیاتوالي او فزیکي پراختیا شاهد پاتې شوی، چې له امله یې د ښاري خدمتونو، زیربناوو او منظم پلان جوړونې اړتیا زیاته شوې ده، موجود ښاري پلانونه د ښار له واقعي وضعیت سره بشپړ سمون نه لري او د غیرپلاني سیمو پراختیا، د ترانسپورتي ستونزو زیاتوالی، د شنو ساحو کمښت او د بنسټیزو خدماتو نارسایي یې له مهمو ننګونو څخه بلل شوې ده.
په ارزونه کې څرګنده شوې چې اوسنی ستراتیژیک پراختیایي پلان تر ډېره پر پخوانیو پلانونو ولاړ دی او نه شي کولای د ښار نوې اړتیاوې، اقتصادي بدلونونه او چاپېریالي ملاحظات په اغېزمن ډول تر پوښښ لاندې راولي، همدې موضوع د دې اړتیا لا پیاوړې کړې چې د بلخ ولسوالۍ د ښار لپاره یو نوی، جامع او معیاري ښاري پلان طرحه شي.
د ارزونې پایله دا ده چې نوی ښاري پلان باید د کره ساحوي معلوماتو پر بنسټ جوړ شي، د دوامدار ښاري پراختیا اصول پکې مراعت شي، د نفوس د ودې مدیریت، د زیربناوو پراختیا او د عامه خدمتونو تنظیم پکې په پام کې ونیول شي، تر څو د بلخ ښار منظم، متوازن او دوامدار پرمختګ تضمین شي.
