په شکردرې ولسوالۍ کې د ښاري پراختیايي پلان د سرغړونو پېژندنه او ساحوي څارنه ترسره شوه
۱۴۴۷/۰۷/۲۴
د کور او ښار جوړولو وزارت د ښاري سرغړونو د مخنیوي د عمومي ریاست د لارښوونو پر بنسټ، د ښاري سرغړونو د مخنیوي او د پروژو د تطبیق د څارنې ریاست اړوند د ښاري پراختیايي پلانونو د نظارت امریت، د دوامدارو څارنو په لړ کې، د کابل ولایت د شکردرې ولسوالۍ څخه ساحوي لیدنه او څارنه ترسره کړه.
د ترسره شوې څارنې پر مهال د ښاري پراختیایي پلان له اصولو سره په ټکر کې یو شمېر سرغړونې وپېژندل شوې، چې پکې په تعلیمي ساحو کې د غیرپلاني استوګنیزو کورونو او باغونو موجودیت، په استوګنیزو ساحو کې غیرپلاني کورونه او کرنیزې باغونه، په صنعتي ساحو کې غیرپلاني استوګنیزې ودانۍ او همدارنګه د سړکونو په مسیر کې د استوګنیزو کورونو او باغونو جوړول شامل دي.
همدارنګه، یاد پلاوي د شکردرې ولسوالۍ له محترمې ښاروالۍ سره د همغږۍ او د پېژندل شوو سرغړونو د مخنیوي په موخه لیدنه ترسره کړه. د دې لیدنې پر مهال د هغو سرغړونو د مخنیوي بهیر وڅېړل شو چې د ښاري پراختیايي پلان په ساحه کې رامنځته شوې وې او تر دې وړاندې یې اړوند ادارې ته په رسمي مکتوب کې خبر ورکړل شوی و.
د ښاري پراختیایي پلانونو مراعات د منظم ښار جوړولو، د عامه خدمتونو د خوندي کولو او د ښاري نظم د ټینګښت لپاره بنسټیز ارزښت لري، او د کور او ښار جوړولو وزارت د دې پلانونو د تطبیق لپاره پر دوامدارې څارنې ټینګار کوي.
