د کابل په یو شمېر ناحیو کې د ښاري تخلفاتو د تثبیت او مخنیوي ګډ هیئت پلټنې پیل کړې
۱۴۴۷/۰۶/۰۳
د کور او ښار جوړولو وزارت د ښاري تخلفاتو د مخنیوي ریاست محترم رئیس انجنیر احمد جاهد شهاب لېوال وایي، د عالیقدر امیرالمؤمنین حفظهالله د حکم او د کور او ښار جوړولو وزارت د محترم مقام د هدایت له مخې، په کابل ښار کې د وزارت ملکیتونو د وضعیت د ارزونې لپاره ګډ تخنیکي هیئت وګمارل شو.
ښاغلی انجنیر شهاب لېوال وایي، په هیئت کې د ښاري تخلفاتو د مخنیوي ریاست، د حقوقي اعتبار ورکولو ریاست، او د املاک او اسکان ریاست استازي شامل دي.
نوموړی وایي، یاد ګډ هیئت له هغو شپږو ساحو څخه لیدنه وکړه چې پخوا په غیرقانوني توګه نیول شوي او یو شمېر شرکتونو او اشخاصو ته په قرارداد ورکړل شوي دي.
د هغه په خبره، هیئت د نهمې، شپاړسمې، دولسمې او دوه ویشتمې ناحیې په اړوند سیمو کې رامنځته شوي تخلفات په نښه کړل، د سیمې له اوسېدونکو یې قانوني اسناد وغوښتل او روان فعالیتونه یې تر بشپړې څېړنې پورې وځنډول.
د ښاري تخلفاتو د مخنیوي ریاست محترم رئیس انجنیر احمد جاهد شهاب لېوال وایي، له ټولو اړوندو اړخونو یې وغوښتل چې ژر تر ژره د کور او ښار جوړولو وزارت ملکیتونه تخلیه کړي او خپل اسناد وزارت ته وسپاري، څو موضوع د شفافیت او قانون پر بنسټ وڅېړل شي.
د کور او ښار جوړولو وزارت د دولتي ملکیتونو د ساتنې او د غیرقانوني استفادې د مخنیوي بهیر ګړندی کړی دی.
