په زابل ولایت کې د شاه جوی ولسوالۍ د مسجد شریف د رغنیزو چارو څارنه ترسره شوه
۱۴۴۷/۰۵/۴
د زابل ولایت د کور او ښار جوړولو ریاست محترم رئیس ملا دادګل مسلم وایي، د دې ریاست اړوند تخنیکي ټیم د زابل ولایت د کابل – کندهار د لویې لارې په اوږدو کې د شاه جوی ولسوالۍ د مسجد شریف د رغنیزو چارو له بهیر څخه څارنه ترسره کړه.
ښاغلي ملا مسلم وویل، د څارنې پر مهال د مسجد شریف د منار د قالب بندۍ، د مسجد د داخلي او خارجي پلستر، د بام د عایق کار او د ملا امام د خونو د خشت کارۍ چارې په منظم ډول روانې وې.
د نوموړي په خبره، تخنیکي ټیم د یادو چارو د کیفیت، د موادو د استعمال او د انجینري معیارونو د پلي کېدو له نږدې څارنه وکړه او قراردادي شرکت ته یې سپارښتنه وکړه چې د مسجد شریف ټول کارونه باید د نقشې، قرارداد او کاري پلان له مخې، د ټاکلي وخت په موده کې بشپړ کړي.
محترم ملا دادګل مسلم زیاته کړه چې د کور او ښار جوړولو ریاست د ټولو رغنیزو پروژو د دقیق څارنې له لارې هڅه کوي څو د عامه تاسیساتو د جوړولو چارې د کیفیت، دوام او ښاري معیارونو له مخې ترسره شي.
د زابل ولایت د کور او ښار جوړولو ریاست د عامه تاسیساتو د رغونې، ترمیم او څارنې مسؤلیت لري. د شاه جوی ولسوالۍ دا مسجد د سیمې د اوسېدونکو د دیني او ټولنیزو اړتیاوو د پوره کولو لپاره رغول کېږي، او د دې ودانۍ د بشپړېدو سره به د خلکو لپاره د عبادت یو معیاري ځای برابر شي.
