د سرپل ولایت د پوهنتون د کانال د تهداب د کارونو څخه تخنیکي نظارت ترسره شو
۱۴۴۷/۰۴/۲۲
د سرپل ولایت د کور او ښار جوړولو ریاست محترم رئیس ملا محمد نور نوراني وایي، د دې ریاست اړوند تخنیکي ټیم د پوهنتون د کانال د ساختماني چارو له بهیر څخه تخنیکي نظارت ترسره کړ.
ښاغلي ملا نوراني وویل، په دې لیدنه کې د تهدابونو دهوارۍ کارونه د نقشې او مشخصاتو له مخې د ۶۷۱ مترو په اوږدوالي وڅارل شول. د څارنې پر مهال څرګنده شوه چې د صفري نقطې (۱۰۰) له ځایه د سطحې د اختلافاتو په پام کې نیولو سره د تهداب د ډبرین کار (سنگکاری) چارې پیل شوې دي.
د نوموړي په خبره، تخنیکي ټیم د ساختماني موادو د ترکیب (مخلوط مصالحو)، د کار د کیفیت او د قراردادي شرکت د عمومي اجراتو له ټولو برخو څخه کتنه وکړه او د مشخصو تخنیکي معیارونو سره سم یې د نظارت او مراقبت راپور ترتیب کړ.
د یادولو وړ ده، چې د کور او ښار جوړولو وزارت د هېواد په کچه د ښوونیزو، خدماتي او بنسټیزو پروژو د کیفیت او معیاري تطبیق د ډاډ لپاره دوامداره څارنه کوي.
