د ښاري نقشو د ویزه کولو کمېسیون ۸ بېلا بېل موضوعات تائید کړل
۱۴۴۶/۱۲/۶
د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني په مشرۍ، د ښاري نقشو د ویزه کولو کمېسیون خپله ۵۷مه غونډه ترسره کړه.
د یادې غونډې په ترڅ کې یې د بېلابېلو ولایتونو څخه د تائید لپاره را استول شوي اته مهم موضوعات تصدیق او تائید کړل.
په دې ناسته کې، کمېسیون د پروژو او طرحو په اړه پراخ بحث وکړ او د ټولو اړوندو مسایلو په اړه یې نظرونه او وړاندیزونه شریک کړل.
یاد اته موضوعات له مخکې د کور او ښار جوړولو وزارت د تخنیکي کمېټې لهخوا د جدي غور لاندې وو.
په دې پروسه کې دقیقې ارزونې او اړوند شرایط وضع شوي او اوس یې په رسمي توګه د ښاري نقشو د ویزه کولو کمېسیون لهخوا تائید ترلاسه کړ.
د دې تایید وروسته، په ټاکلو ښارونو او ځمکو کې د مناسبې ښاري پراختیا لپاره د ځینو مهمو پروژو د تطبیق لپاره لاره هوارېږي.
د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني وایي، د دغې غونډې د پایلې پر اساس، د ښاري پراختیا په برخه کې د ودانیو او تجارتي بلاکونو د جوړولو طرحې، د تجارتي او استوګنیزو کمپلکسونو پلانونه، او د انجنیرۍ د نقشو تایید به د ښاري سیمو په ښه انکشاف کې مهم رول ولري.
