د کور او ښار جوړولو وزیر، افغانستان لپاره د اغاخان بنسټ له مسؤل سره وکتل
۱۴۴۶/۱/۱۹
د کور او ښار جوړلوو وزارت محترم سرپرست وزیر الحاج شیخ حمدالله نعماني، د افغانستان لپاره د اغا خان بنسټ له مسؤل محترم ډاکتر نجم الدین سره وکتل او په یو شمېر موضوعاتو یې خبرې وکړې.
په ناسته کې لومړی، افغانستان لپاره د اغا خان بنسټ مسؤل ښاغلي ډاکتر نجم الدین د یاد بنسټ د فعالیتونو، لاسته راوړنو او راتلونکو پلانونو په اړه معلومات وړاندې کړل.
ورپسې د کور او ښار جوړولو وزارت محترم سرپرست وزیر الحاج شیخ حمدالله نعماني د یاد بنسټ د فعالیتونو د لا پیاوړتیا، او اغېزمن فعالیت په موخه یو شمېر وړاندیزونه وکړل او غوښتنه یې وکړه، چې د کور او ښار جوړولو وزارت سره همکار پاتې شي.
ښاغلي وزیر وویل، له افغانانو سره د اغا خان بنسټ له مرستو مننه وکړه، او زیاته یې کړه، اړتیا ده چې یاد بنسټ د وروستیو سیلابونو او طبعي پېښو له امله زیانمنو کورنیو سره د همکارۍ په موخه لاس په کار شي او د هغې کمېټې سره د سروې او نورو پایلو د شریکو او ترسره کولو برخه کې همکاري وکړي، چې د ا.ا.ا د ریاسة الوزرا محترم عالي مقام له لوري رامنځته شوې، تر څو زیانمنو کورنیو سره د واحدې منبع له لارې مرسته وشي.
افغانستان لپاره د اغاخان بنسټ مسؤل ښاغلي ډاکتر نجم الدین ژمنه وکړه، چې په یادو برخو کې به تر خپلې وسې همکاري کوي او په ځینو برخو کې د دوی له لوري د ترسره شوو سروې ګانو موندنې به له کمېټې سره شریکوي.
نوموړي وویل، په بېلا بېلو برخو کې له افغانانو سره مرستې کوي او دغې چارې ته به دوام او پراختیا ورکوي.
نجم الدین وویل، د روغتیا، خوراکي او نورو برخو سربېره د تاریخي ابدو په ترمیم او ساتنې برخه کې هم کار کوي چې دغه برخه کې به د کور او ښار جوړولو وزارت سره په همغږۍ او همکارۍ چارې ترسره کړي.
د کور او ښار جوړولو وزارت محترم سرپرست وزیر وویل، بغلان، تخار او نورو ولایتونو کې چې د سیلابونو له امله کورونه په بشپړه توګه او یا هم په قسمي توګه وران شوي، اړتیا ده چې ارقام یې معلوم او د لاسنیوي په موخه اقدام وشي.
