د کابل شاه دو شمشېره رح له سیمې تر پُل باغ عمومي لیدنه او څارنه وشوه
۱۴۴۵/۱۰/۲۳
د کور او ښار جوړولو وزارت د پخوانیو ښارونو د ساتنې او خوندیتوب ریاست محترم رئیس انجنیر محمود جان دوست وایي، د ریاست اړوند تخنیکي ټیم یې د کابل ښار د پخوانیو ساحو د څارنې په لړ کې د شاه دوشمشېره رح له سیمې تر پُل باغ عمومي پخوانۍ سیمې وڅارلې.
ښاغلی انجنیر محمود جان دوست وایي، په یاده ساحه کې د کابل ښاروالۍ د کلتوري ریاست او د سیمې د هټیو مالکانو په لګښت د پخوانیو ساحو د بیروني برخو ترمیمات پیل کړي، چې د کور او ښار جوړولو وزارت اړوند ریاست تخنیکي ټیم مسؤلینو او کار کوونکو ته لازمې فني او تخنیکي لارښوونې او مشورې ورکړې.
نوموړی وایي، د تاریخي ابداتو ترمیم او په ځانګړې توګه کابل کې د یادو ساحو ساتنه او پالنه ستر تاریخي او فرهنګي ارزښت لري او په وینا یې باید ټولې چارې د فني او تخنیکي کسانو تر څار لاندې ترسره شي، تر څو په یاده برخه کې د ملي او نړیوالو قبول شوو قوانینو په رڼا کې چارې سرته ورسېږي.
هغه وایي، د پخوانیو ښارونو او تاریخي ابداتو د ترمیم، ساتنې او پالنې برخه کې یې د کابل ښاروالۍ د کلتوري ریاست محترمو مسؤلینو ته هم لازمې سپارښتنې وکړې او یادونه یې وکړه چې ورته چارې باید د کور او ښار جوړولو وزارت سره په همغږۍ او تفاهم سرته ورسېږي.
