ښار جوړولو او ځمکو وزارت سرپرست وزیر په کابل کې د اروپایي اتحادیې له سفیر سره وکتل
ښار جوړولو او ځمکو وزارت سرپرست وزیر محترم محمود کرزی په کابل کې د اروپایي اتحادیې له سفیر ښاغلی پیري میادون سره وکتل او پر دوه اړخیزه همکاریو خبرې وکړې.
په سر کې، د ښار جوړولو او ځمکو وزارت سرپرست وزیر محترم محمود کرزی له افغانستان دولت سره په اقتصادي او پرمختیایي برخو کې د اروپایي اتحادیې له بېدریغه همکاریو مننه وکړه او زیاته یې کړه چې اروپایي اتحادیه په هېواد کې د ټولګټو پروژو په تطبیق کې رغنده رول لوبولی.
په همدې ترتیب، د ښار جوړولو او ځمکو وزارت سرپرست وزیر د بې ځایه شویو کډوالو او راستنېدونکو د مېشتېدنې په برخه کې د شورا پروګرام هڅې وستایلې او زیاته یې کړه چې د اروپايي اتحادیې په مالي مرسته او د شورا پروګرام په تخنیکي همکارۍ یاد وزارت په کابل او هرات ولایتونو کې د مهاجرینو د دوه ښارګوټو د جوړولو چارې پیل کړي چې له دې سره به ګڼ شمېر هیوادوالو ته د استوګنې زمینه برابره شي.
ښار جوړولو او ځمکو وزارت سرپرست وزیر وویل چې د جلالتماب جمهور رئیس د لارښوونې سره سم په یو شمېر ولایتونو کې د نوي کور او ښارګوټي جوړول په پام کې دي او دا وزارت هڅه کوي د جمهور رئیس د لارښوونې په رڼا کې د ښارګوټو زیربنایی چارې په اساسي توګه تنظیم او د تمویلوونکو او اړونده ادارو په مرسته ساختماني چارې هم پیل کړي.
په همدې توګه، د ښار جوړولو او ځمکو وزارت مرستیالانو هر یو محترم روښان ولسمل او محترم عزیز احمد ګلستانی د ټولګټو پروژو په تطبیق کې د اروپايي اتحادیې نقش مهم وباله او زیاته یې کړه چې یاد وزارت د شورا پروګرام د ښه تطبیق لپاره چې پایله یې د بې ځایه شویو کډوالو او راستنېدونکو لپاره د استوګنې زمینه برابره ول دي هر راز همکاري ته چمتو ده.
ورپسې، په کابل کې د اروپایي اتحادیې سفیر ښاغلی پیري میادون شورا پروګرام سره د ښار جوړولو او ځمکو وزارت له هر اړخیزه همکارۍ مننه وکړه او د دې وزارت نقش یې د مهاجرینو د ښارګوټو په جوړونې او د دوی د استوګنې په برخه کې خورا مهم وباله. ښاغلی پیري میادون زیاته کړه چې اروپایي اتحادیه په جینوا کنفرانس کې د افغانستان جمهوري دولت د لومړیتوبونو پر اساس به خپل تعهدات تجدید کړي.
همداراز هغه وویل چې د اروپایي اتحادیې په مالي مرسته په پام کې ده چې اوه کلن پروګرام (۲۰۲۰ تر ۲۰۲۷) رامنځته شي او ټینګار یې وکړ چې د نوي کورونو او ښارګوټو د جوړونې په برخه کې به د منابعو په بسیج کې خپلې هڅې ګړندی کړي.
###
