د نیله باغ استوګنیزې پروژې د چارو پرمختګ په اړه خبرې وشوې
۱۴۴۷/۰۲/۱۲
د کور او ښار جوړولو وزارت محترم سرپرست وزیر الحاج مولوي نجیبالله حیات حقاني، په خپل کاري دفتر کې د چین د نیمه دولتي ساختماني شرکت ایم سی سی ۱۹ له رئیس ښاغلي لی لونګ سره وکتل.
په دې ناسته کې ښاغلي لی لونګ د نیله باغ د پراختیایي پروژې په اړه بشپړمعلومات وړاندې کړل، نوموړي څرګنده کړه چې په دې ستر پروژه کې یو شمیر چینایي متخصصین بوخت دي او په کې ټولټال ۱۴۰۰ استوکنیز کورونه په نړیوالو او اساسي معیارونو سره جوړېږي.
همدارنګه، ښاغلي لی لونګ د پروژې د اوبو او برښنا د ستونزو د حل غوښتنه وکړه، او د کور او ښار جوړولو وزارت محترم سرپرست وزیر نه یې هیله وکړه چې د نیله باغ پروژه له نږدې وګوري او چارې یې وارزوي.
د کور او ښار جوړولو وزارت محترم سرپرست وزیر د چین هېواد له همکاریو مننه وکړه وې ویل، چې د سرپناه په برخه کې د چین هېواد مرستې د قدر وړ دي، نوموړي همداراز ډاډ ورکړ چې د پروژې د پرمخ وړلو په وړاندې هر ډول ستونزې به په چټکۍ او مؤثره توګه هوارې شي.
ښاغلي سرپرست وزیر ټینګار وکړ، چې په مناسب وخت کې به خپله د نیله باغ پروژې څخه له نږدې لیدنه وکړي.
د کور او ښار جوړولو وزارت محترم سرپرست وزیر الحاج مولوي نجیب الله حیات حقاني، ټینګار کوي چې د مسکن په تړاو پروژې دې په ښه کیفیت او منل شوې نقشې په خپل وخت سرته و رسیږي.
