دولتي ځمکې د سالمې ګټې اخیستنې په موخه سروې کېږي
۱۴۴۵/۱۰/۱۵
د کور او ښار جوړولو وزارت د هېواد په کچه له دولتي ځمکو څخه د سالمې او اغېزمنې ګټې پورته کولو په موخه بېلا بېل پروګرامونه لري.
زابل ولایت کې د کور او ښار جوړولو ریاست محترم رئیس ملا دادګل مسلم وایي، د دې ریاست تخنیکي ټیم د قلات ښار د ښاروالۍ مارکېټ لپاره ساحه توپوګرافي سروې کړه.
د ښاغلي ملا مسلم په خبره، د قلات ښار د ښاروالۍ مارکېټ به په ۲۰ جریبه ځمکه کې جوړشي، چې د یاد مارکېټ په جوړولو سره به د هټیوالو ستونزې حل او دا به د دولت لپاره یوه ښه عایداتي منبع هم وګرځي.
توپوګرافي سروې د ښاري او ساختماني پلان لپاره یوه بنسټیزه سروې ده، چې د ځمکې د سطحې فزيکي ځانګړتیاوې او د هغې افقي او عمودي واټن په اړه معلومات ټاکي.
د کور او ښار جوړولو وزارت تخنیکي ټیمونه په پلازمېنه او ولایتونو کې د دولتي ادارو په غوښتنه د پروژو له چارو څارنه کوي، تر څو د پروژو چارې په مسلکي او انجنیري اصولو برابرې تر سره شي.
