د لابراتوار ریاست تخنیکي ټیم د بېلابېلو پروژو له چارو څخه څارنه وکړه
۱۴۴۸/۴/۱
د کور او ښار جوړولو وزارت د لابراتوار ریاست اړوند تخنیکي ټیم د منظمې تخنیکي څارنې په لړ کې د هېواد په بېلابېلو ساختماني پروژو کې د ودانیزو او لابراتواري چارو له بهیر څخه څارنه ترسره کړه.
د څارنې په ترڅ کې د الشفاء روغتون، د افغانستان بانک د نوې ودانۍ، د بهرنیو چارو وزارت د ستراتېژیکو مطالعاتو پروژې، پنځم مکروریان سولې، د لوی نظارت او فرمانونو د تعقیب او د قطر استوګنیز ښارګوټي پروژو ودانیزې او لابراتواري چارې وکتل شوې.
د څارنې پر مهال د بېلابېلو ساختماني توکو کیفیت، د ودانیزو چارو د پرمختګ وضعیت، د کانکریټ، سیخ تړل، پایلونو، المونیم او نورو اړوندو ساختماني موادو د لابراتواري ازموینو بهیر وڅېړل شو.
همداراز، په ځینو پروژو کې د ساختماني موادو د مقاومت او کیفیت اړوند ازموینې ترسره او د روانو چارو وضعیت وارزول شو.
د تخنیکي څارنې پر مهال د پروژو اړوندو قراردادي شرکتونو ته سپارښتنه وشوه چې ټولې ودانیزې چارې د منظور شوو نقشو، مشخصاتو او تخنیکي معیارونو له مخې، د کیفیت په پام کې نیولو سره او د اړوندو مراقبتي انجنیرانو تر څارنې لاندې ترسره کړي.
د کور او ښار جوړولو وزارت د لابراتوار ریاست تخنیکي څارنې د ودانیزو پروژو د کیفیت د کنټرول، د ساختماني موادو د معیارونو د ارزونې او د تخنیکي اصولو د رعایت د ډاډ ترلاسه کولو په موخه ترسره کېږي او دا بهیر به د وزارت د کاري پلان له مخې دوام ولري.
