د کندهار د جامعه عمر پراختیایي پروژې چارې په چټک او منظم ډول روانې دي
۱۴۴۷/۱۲/۸
کندهار کې د کور او ښار جوړولو محترم ریاست اړوند تخنیکي او مسلکي ټیم په دغه ولایت کې د جامعه عمر پراختیایي پروژې د روانو چارو په تړاو ډاډ څرګند کړ.
جامعه عمر پراختیایي پروژه، کندهار ولایت کې له مهمو بنسټیزو پروژو څخه ګڼل کېږي، چې د کور او ښار جوړولو وزارت، د مسکن ودانیزو چارو او د برنامو د پراختیا محترم معین الحاج مولوي ګل زرین صابر له لوري یې د یو خصوصي ساختماني شرکت سره د ځینو برخو د جوړولو تړون لاسلیک شو.
کندهار ولایت کې د جامعه عمر د پراختیایي پروژې عملي چارې په منظم او نورمال ډول دوام لري او د پروژې پرمختګ هره ورځ د کور او ښار جوړولو ریاست اړوند تخنیکي او مسلکي ټیمونو له لوري له نږدې څارل کېږي.
یاده پروژه د ښاري پراختیا، معیاري زېربناوو جوړولو او د دیني او عامه خدماتو د پیاوړتیا په موخه پلي کېږي، چې ورسره به د سیمې د اوسېدونکو یو شمېر اړتیاوې هوارې شي.
تخنیکي ټیمونه د نقشو، ساختماني معیارونو او انجینري اصولو له مخې د کار کیفیت ارزوي او د تطبیق هر پړاو په دوامداره ډول ثبت او بررسي کوي.
کندهار ولایت کې د کور او ښار جوړولو ریاست تخنیکي کارکوونکي وایي، د پروژې د تطبیق پر مهال د ساختماني موادو کیفیت، تخنیکي معیارونه، د خوندیتوب اصول او د وخت مدیریت هغه مهم موارد دي چې هره ورځ تر نظارت لاندې نیول کېږي، څو چارې د منظور شویو ډیزاینونو مطابق بشپړې شي.
