د کابل ولایت خاک جبار ولسوالۍ کې د مهاجرینو لپاره د نوي استوګنیز ښارګوټي تفصیلي پلان تر بشپړېدو وروسته تائید او لاسلیک شو
۱۴۴۷/۱۲/۳
مهاجرینو ته د هر اړخیزو خدماتو وړاندې کولو او دایمي مېشتېدنې په پار د کور او ښار جوړولو وزارت هڅې لا ګړندۍ کړي او د پارختیا په حال کې دي.
تازه؛ د یاد وزارت د محترم وزیر الحاج مولوي نجیب الله حیات حقاني له لوري د کابل ولایت د خاک جبار ولسوالۍ په مربوطاتو کې د راستنېدونکو مهاجرینو د دایمي مېشتېدنې او باعزته ژوند په موخه د نوي استوګنیز ښارګوټي تفصیلي پلان تائید او لاسلیک شو.
د یاد وزارت محترم وزیر الحاج مولوي نجیب الله حیات حقاني د دغه ښارګوټي د تفصیلي پلان د تائید پر مهال وویل، اسلامي امارت ژمن دی چې راستنېدونکو هېوادوالو ته د سرپناه، اساسي خدماتو او مناسب ژوند زمینه برابره کړي، څو هغوی وکولای شي په خوندي او معیاري چاپېریال کې خپل ژوند ته دوام ورکړي.
په دې ښارګوټي کې ټولې (۴۶۵۲) څلور زره، شپږ سوه او دوه پنځوس استوګنیزې نمرې په پام کې نیول شوې دي، چې د اړمنو او راستنو شوو مهاجرو کورنیو لپاره به په منظم او شفاف ډول ووېشل شي.
همداراز د ښارګوټي په تفصیلي پلان کې د استوګنې تر څنګ د ژوند ټولو مهمو برخو ته ځانګړې پاملرنه شوې ده، چې د سړکونو معیاري شبکه، جوماتونه، ښوونځي، روغتیايي مرکزونه، سوداګریز مارکیټونه، شنې ساحې، د پاکو اوبو رسولو سیستم، برېښنا، عامه تأسیسات او نور بنسټیز خدمات د پلان اساسي برخې جوړوي، څو اوسېدونکو ته یو مناسب، منظم او باکیفیته ښاري چاپېریال برابر شي.
د کور او ښار جوړولو وزارت له لوري، د هېواد په بېلابېلو ولایتونو کې د ورته ښارګوټو د طرحې او جوړولو لړۍ دوام لري او هڅه کېږي، څو راستنېدونکي هېوادوال د عزت، ثبات او هوساینې له شرایطو برخمن شي، چې ورسره به د سیمې په اقتصادي او ټولنیز پرمختګ کې اغېزمن ګامونه پورته شي.
