په خوست کې د ورزي کلینیک د ودانیزو چارو څارنه ترسره شوه
۱۴۴۷/۰۴/۱۶
د خوست ولایت د کور او ښار جوړولو ریاست اړوند تخنیکي ټیم د عامې روغتیا ریاست اړوند د اسماعیل خېلو او مندوزیو ولسوالۍ د ورزي کلینیک له ودانیزو چارو څخه لیدنه وکړه.
د خوست ولایت د کور او ښار جوړولو ریاست محترم رئیس مولوي امان الله اسد وویل، ورزي کلینیک په یو پوړ کې د اساسي ساختماني معیارونو پر بنسټ جوړیږي، چې پکې شپږ صحي خونې، دوه اداري خونې، د اوبو څاه، د فاضلاب سیستم، برقي سیستم او د احاطې دیوال شامل دي.
هغه زیاته کړه چې د دې پروژې مالي لګښت د IOM نړيوالې مؤسسې له خوا برابر شوی چې ټولټال یې ۶.۵ میلیونه افغانۍ کېږي. تر اوسه د پروژې لس سلنه چارې بشپړې شوې دي او د ودانیزو چارو دوامداره څارنه د کور او ښار جوړولو ریاست د انجینري او تخنیکي ټیم لخوا ترسره کېږي.
د خوست ولایت د ورزي کلینیک پروژه د عامې روغتیا ریاست په چوکاټ کې د روغتیایي خدمتونو د پیاوړتیا او د خلکو د اساسي اړتیاوو د پوره کولو په موخه پيل شوې ده. د دې پروژې له بشپړېدو وروسته به د سیمې خلکو ته د معیاري روغتیایي خدمتونو وړاندې کولو لپاره لازمه اسانتیا برابره شي.
