د ښار جوړولو او ځمکو وزارت له یو شمېر هېوادوالو سره وکتل او د ښاري نظم او دسپلین په اړه یې سره خبرې وکړې
د ښارجوړولو او ځمکو وزارت سرپرست ښاغلي مولوي حمد الله نعماني له بیلا بیلو ولایتونو څخه راغلو هېوادوالو سره وکتل، د هغوی وړاندیزونه او غوښتنې یې واورې او په ځینو برخو کې یې ورته لازمې لارښوونې وکړې.
په دغه ناسته کې ښاغلي وزیر پر هېوادپالنه او له اسلامي امارت سره د خلکو په ملاتړ او همکارۍ ټینګار وکړ او دا چې څنګه کېدای شي ښاري چارې لا منظمې او چټکې شي.
راغلو هېوادوالو له وزیر حمد الله نعماني سره په خبرو کې د هېواد په کچه د پنځه لویو ښارونو د ځینو چارو په اړه خبرې وکړې.
دغه هېوادوالو چوتوالی وښود چې د لویو ښارونو په ترتیب او تنظیم، ترافیکي ګڼې ګوڼې، کنالیزاسیون، شنو ساحو او ځینو نورو برخو کې کولی شي خپلې مشورې او نظریات د وزارت له مسؤلینو سره شریک کړي ترڅو وکولی شي ښاري معیارونه برابر شي.
د ښار جوړولو او ځمکو وزارت له وزیر ښاغلي مولوي حمدالله نعماني سره په لیدنه کې دغه شمېر هېوادوالو یادونه وکړه چې غواړي خپل هېواد ته کار وکړي، ځکه په وینا یې د عمر ډیره برخه انرژي یې د نورو هېوادونو په خدمت کې تېره کړې، خو دا چې اوس هېواد خپلواک او ازاد شو نو له دې وروسته غواړي خپل هېواد ته راستانه او دلته خدمات وکړي.
د ښارجوړولو او ځمکو وزارت سرپرست ښاغلي نعماني د یادو هېوادوالو له نیک نیت او احساساتو مننه او ستاینه وکړه او تینګار یې وکړ چې دوی غواړي د هېواد په کچه ښارونه د سیمې او نړۍ په معیارونو برابر شي.
راغلو هېوادوالو ته په خطاب کې ښاغلي مولوي حمدالله نعماني وویل، چې د ښارونو پرمختګ، پراختیا او تنظیم لپاره دې یو پرزنټېشن برابر شي او پر هغه لارو چارو دې غور وشي چې څنګه کېدای شي ښارونه معیاري شي.
ټینګار پر دې وشو چې باید له فرصتونو ګټه پورته شي او د هېواد بیارغونې او ابادۍ لپاره نه ستړې کېدونکي ګامونه پورته شي.
