د کابل ښار په پنځمه ناحیه کې د ساختماني چارو د څارنې پر مهال د یو شمېر ودانیو کارونه ودرول شول
۱۴۴۸/۳/۱۷
د کور او ښار جوړولو وزارت د کیفیت کنټرول او ښاري سرغړونو ته د رسېدنې عمومي ریاست اړوند د ښاري سرغړونو د مخنیوي ریاست تخنیکي ټیم د کاري پلان له مخې، د کابل ښار د پنځمې ناحیې اړوند په سره میاشت ښارګوټي کې د جوړېدونکو ودانیو له چارو څخه څارنه او ارزونه وکړه.
د څارنې پر مهال د یو شمېر ودانیو ساختماني چارې ودرول شوې او اړوندو مسؤلینو ته خبرتیا ورکړل شوه، څو د ودانیزو چارو اسناد، مدارک او رسمي جوازونه د ښاري سرغړونو د څېړنې ریاست ته وسپاري، ترڅو له منظور شوو ښاري پلانونو سره یې مطابقت وکتل شي او د سرغړونې د تثبیت په صورت کې لازم قانوني اقدامات ترسره شي.
د دې څارنې موخه د ودانیو د جوړولو د چارو له ښاري پلانونو سره سمون، د زیاتې ګڼې ګوڼې مخنیوی، د ښاري بې نظمۍ مخنیوی، د ګاونډیانو د حقونو او حریم ساتنه، د ودانیزو چارو د کیفیت لوړول او د ښاري مدیریت ښه والی دی.
د یادونې وړ ده چې د ښاري سرغړونو د مخنیوي ریاست د محترم رئیس په لارښوونه، د کابل ښار په بېلابېلو ناحیو کې د ودانیو د څارنې بهیر په دوامدار او هدفمند ډول روان دی او د هر ډول سرغړونې پر وړاندې به د نافذه قوانینو له مخې لازم اقدامات ترسره کېږي.
