په کابل ښار کې د غیرپلاني ښاري جوړښتونو مخنیوی او د ښاري قوانینو د تطبیق څارنه وشوه
۱۴۴۷/۸/۲۸
د کور او ښار جوړولو وزارت، له ښاري تخلفاتو د مخنیوي او د پروژو پر تطبیق د څار عمومي ریاست اړوند، د ښاري تخلفاتو د مخنیوي ریاست ټیمونو، د کابل ښار ۱۷مې ناحیې سیمو څخه تخنیکي څارنه او ارزونه وکړه.
د دې څارنې موخه د هغه هټیو، ورکشاپونو، رستورانتونو، نورو سوداګریزو او صنعتي فعالیتونو ارزونه وه، چې د کوتل سړک له پیل تر پای پورې جوړ شوي دي.
په دغه څارنه کې د ادروگل ښارګوټی او طلایی ښارګوټی هم شامل وو.
تر دې وړاندې، د یادو ساحو مالکینو ته رسمي خبرتیاوې هم ورکړل شوې وې چې د ټاکل شوې نېټې له ثبتېدو وروسته به په ۱۵ ورځو کې غیر پلاني جوړښتونه یا له منځته یوسي او یا په کې اصلاحات راولي.
د دې خبرتیا په پایله کې، ګڼ شمېر مالکینو خپل فعالیتونه یا ودرول او یا یې مناسب ځایونو ته انتقال کړل، اما د مهلت نېټې تر پای ته رسېدو پورې ځینو نورو اشخاصو بیا هېڅ د اصلاح اقدام ونه کړ، چې ځایونه یې مُهر او لاک شول او فعالیتونه یې بند شول.
یاد اقدام د ښاري قوانینو د تطبیق، د سړکونو او ښار د پلي لارو د ګڼې ګوڼې مخنیوي، د پروژو د پلان سره سم تطبیق، او د غیر پلاني جوړښتونو د پراختیا د مخنیوي لپاره ترسره شو.
