مالي او اداري مرستیال

د مالي او اداري مرستیال، انجینیر حامد جلیل صافي پیژندګلوي.

ښاغلی انجینیر حامد جلیل صافی په کال ۱۳۵۶ ل.ل کې د کابل ښار په دریمه ناحیه کې زوکړی دی.

 د کوچنیوالي پېر یې د خپلې روحاني کورنۍ په غیږه کې تېر کړ او په ۱۳۶۳ ل.ل کال کې د درخانۍ ښوونځي ته شامل شو، کال وروسته له خپلې کورنۍ سره له کابله پیښور ته بې ځایه شو او د ښوونځي دوره یې د سید جماالدین افغان په لیسه کې پای ته رسولې، نوموړي په ۱۳۷۶ ل.ل کال کې کابل پوهنتون ته لاره و موندله او په ۱۳۸۰ل.ل کال د ساختماني انجینیري له څانګې فارغ شو.    

انجینیر حامد جلیل صافی په ۱۳۸۰ ل.ل کال کې د دوهم ځل لپاره پاکستان هیواد ته ولاړ او د ۱۳۸۰-۱۳۸۲ کلونو په اوږدو کې یې د دې ترڅنګ چې له نادولتي موسیسو سره کار کاوه، د ماسټرۍ دوره د پاکستان هیواد په پریستون پوهنتون کې د ادارې او سوداګرۍ په څانګه کې په مدیریت او بشري سرچینو کې له تخصص سره، پای ته رسولې ده.    

ښاغلی حامد جلیل په ۱۳۸۲ ل.ل کال کې هیوادوالو ته د خدمت په موخه بیا خپل هیواد افغانستان ته له پاکستانه راستون شو او د ۱۳۸۴ل.ل کال ترمرغومي (جدي)میاشتې پورې یې د سنایي بنسټیزې پراختیایي موسيسې د برنامو پراختیایي څانګې د آمر په توګه دنده ترسره کړې ده.

د ۱۳۸۴ ل.ل کال په وروستیو کې نوموړي له حکومت سره، د ماليې وزارت، بودجې ریاست د بهرنیو مرستو د انسجام مسول په توګه کار پیل کړ او د ۱۳۹۱ کال تر زمري میاشتې پورې یې د بهرنیو مرستو د انسجام ریئس په توګه دنده درلودله.

نوموړي د دې ترڅنګ چې د مالیې وزارت د انسجام ریاست دنده پر مخ بیوله په کال ۱۳۸۶ل.ل کې د ازادې سیالې له لارې د کابل پوهنتون ماسټرۍ پروګرام  د عامه ادارې او پالیسۍ څانګې  ته ور بریالی شو، د ماسټرۍ کورس له بشپړولو ورسته حامد جلیل صافي ته په ۱۳۸۸ ل.ل کال کې دا زمینه برابره شوه چې په همدې څانګه کې د تخصص په موخه د امریکې واشنګټن پوهنتون ته شامل شي، نوموړي له یاد پوهنتون څخه د پراختیایی مطالعاتو په برخه کې تخصص تر لاسه کړ، او د ماسټرۍ دورې پایلیک (تیزیس) یې « د افغانستان په پراختیا کې د بهرنیو مرستو د اغیزې» تر سرلیک لاندې ولیکه چې په خپله برخه کې یوه ډېره غوره رساله بلله کیږي او په کال ۱۳۸۹ل.ل کې یې د ماسټرۍ دوره پای ته ورسوله.

ښاغلی انجینیر حامد جلیل صافی، پر دې سربیره چې د ماسټرۍ په کچه لوړې زده کړې لري، لنډ مهاله مسلکي زده کړې لکه: عامه مدیریت، د سولې ټینګښت، د جکړې او اخ وډب پر مهال کار، د زیان نه رسولو په برخه کې د روزونکو روزنه، بودجه رغونه او د عامه مالیاتي چارو اداره، د پروژو پر پایلو بنا مدیریت، دولتي اقتصاد،  د مالیاتی چارو او عامه پالیسۍ پر حقوقو ولاړ پراختیایي روش، یې هم تعقیب کړې دي.

نوموړی د بهرنیو مرستو د ادارې او انسجام، بودجه جوړونې او مالیاتي ادارې، د عامه پالیسۍ په پراختیا، د برنامو په اداره او انسجام کې دولس کلنه تجربه او غوره مهارتونه لري.

 همدارنګه له مالیې وزارت، ملګرو میلتونو او نورو نا دولتي موسیسو سره د کار اوه کلن تجربه یې شالید لري.

د ۱۳۹۱ ل.ل کال له زمري میاشتي را په دېخوا د ښاراو کور جوړونې وزارت د مالي او ادري مرستیال په توګه دنده تر سره کوي، په پښتو، دري، انګلیسي او هندي ژبو بشپړ واک لري.

نوموړي تر ۲۰ ډیرو هیوادونو ته رسمي سفرونه کړي دي.

د لا زیاتو مالوماتو لپاره مو لاندې څو ټکو ته پام را اړوم.

الف نا دولتي فعالیتونه.

۱. د ۱۳۸۰ ل.ل کال له لړم  نه د ۱۳۸۱ل.ل کال تر غبرګولي پورې په پاکستان هیواد کې د ناروې پروژې په دفتر کې د اجتماعي کارکوونکي په توګه.

نوموړی د هغه کاري ټیم یو غړی هم پاته شوی دی چې افغان مهاجرینو ته یې د اروا پوهنې په برخه کې مشورتي خدمتونه او بشري مرستې برابرولې.

۲. د ۱۳۸۱ ل.ل کال له  جوزا  را په دېخوا د ۱۳۸۴ ل.ل کال تر لیندۍ پورې د سنايي پراختیایی بنسټ د پروژو آمر.

په دې پېر کې نوموړي له سنایي پراختیایي بنسټ پروژې سره، چې د کورنیو نا دولتي موسیسو له ډلې څخه یوه موسیسه ده ، د امر په توګه کار کړی دی.

 د مدیریت په پراختیایې برخه کې یې دا لاندې عمده فعالیتونه تر سره کړي دي.

۱. د سولې د پایښت، پوهنې، روغتیا او د کلیو د پراختیا په برخه کې د ډېری پروژو طرحه او پلې کول.

۲. د څو پراختیایي پروژو د څارنې او ارزونې د سروې ګانو په لاره اچول.

۳. د پروژو د څارنې او ارزونې سیسټمونه په لاره اچول.

۴.له پروژو څخه د کټه اخیستونکو، بهرنیو هېوادونو او مرسته کوونکو بنسټونو ترمنځ د اړیکو غښتلې کول.

۵. د پروژې د ارزیابۍ او مدیریت په برخو کې د کارکوونکو د ظرفیت لوړونې په عرصه کې فعال رول درلول.

ب دولتي/ رسمي فعالیتونه.

۱. د ۱۳۸۴ل.ل کال له مرغومې څخه د ۱۳۹۱ ل.ل کال تر زمري  پورې د مالې وزارت د بهرنیو مرستو د انسجام ریئس.

تر شپږ ډېر کلونه یې د مالیې وزارت د انسجام په ریاست کې په بیلابیلو پوسټونو کار کړی دی، نوموړي خپل کار د پراختیایي مرستو د څارنې مسول په توګه پیل کړی، چې ډېر ژر د مرستو د انسجام  آمر شو او وروسته د مرستو د ادارې او انسجام د ریئس په توګه و ټاکل شو. نوموړی سر بیره پر دې چې د بهرنیو مرستو د انسجام رئیس و له پراختیایي همکارانو( ملګرو ملیتونو او د نړۍ والې ټولنې له مرسته کوونکو هېوادونو) سره د حکومت له لوري د استازي په توګه یې دنده هم پرمخ بیولې ده چې تر ټولو مهم فعالیتونه یې دا دي.

۲. د بهرنیو مرستو د ادارې لپاره د پالیسي په جوړونه کې فعاله ونډه اخیستل.

۳. د ملې بودجې په ترتیب او پلې کولو کې فعال رول درلودل.

۴. د مرستو د اغیز په برخه کې د پاریس اعلامیې په اړه د حکومتي ادارو همغږی کوونکی، د پاریس اعلامیې د دوو سروې ګانو څارنه او همدارنګه له کړکیچ سره په مخ شوو هیوادونو کې د غوره نړیوال ګډون له اصولو څخه نظارت.

۵. په نړۍ واله ټولنه کې د مرستو د اغیز په برخه کې د افغانستان استازی.

۶. د پراختیایي همکاریو، حساب ورکونې او روڼتیا په برخه کې د مهمو ابزارو غښتلتیا.

۷. د مالېې وزیر او مرستیال ته یې د پراختیایي مرستو د اغیز په اړوند د لازمو مشورو ورکړه او په دې برخه کې له مرسته کوونکو هیوادونو او بنسټونو سره همغږي را منځته کول.

له مرسته کوونکو هېوادونو او موسیسو سره د بلاعوضه مرستو او پورونو په برخه کې، د حکومت له لوري د مذاکراتو مشري.

  د اطلاعاتو او عامه اړیکو ریاست